Ауданда балалардың құқықтарын қорғау, тұрмыстық зорлық-зомбылықтың алдын алу және жасөспірімдердің құқықтық сауаттылығын арттыру мақсатында кешенді шаралар қолға алынды.
Облыс әкімінің тапсырмасына сәйкес, кәмелетке толмағандар арасындағы құқық бұзушылықтың алдын алу жөніндегі арнайы жұмысшы топ құрылып, бүгінде аудан мектептерінде жүйелі түрде түсіндіру және профилактикалық жұмыстар жүргізілуде.
Аталған топтың құрамында аудан әкімінің орынбасары Мейірхан Өмірбек, аудандық білім бөлімінің басшысы Зауре Абдрасилова, аудандық прокуратураның аға прокуроры Хиса Әжімбеков, аудандық полиция бөлімінің қызметкерлері, орталық аурухананың өкілдері мен медициналық мамандар бар.
Жұмысшы топтың мүшелері бүгін ауданның бірнеше білім ордаларында — Асанбай Асқаров атындағы мектеп-гимназиясында, Иван Трубицын атындағы №17 мектеп-гимназиясында, сондай-ақ, Тұрар Рысқұлов атындағы №20 және №44 жалпы білім беретін мектептерінде жоғары сынып оқушыларымен кездесулер өткізді.
Кездесулер барысында оқушыларға өз құқықтары мен міндеттерін білу, заңды құрметтеу, әділдік пен жауапкершілік сезімін қалыптастырудың маңыздылығы түсіндірілді. Мамандар балалардың құқықтық сауаттылығын арттыру — олардың өз құқықтарын қорғай білуіне, қоғамда белсенді әрі саналы азамат болып қалыптасуына жол ашатынын атап өтті.
Сонымен қатар, жұмысшы топ мектептердегі қауіпсіздік шараларын, асханалардың жұмысын, материалдық-техникалық базаны және медициналық кабинеттердің жағдайын да зерделеді. Әр оқу орнында оқушылардың денсаулығы мен қауіпсіздігін қамтамасыз ету бағытындағы жұмыстардың сапасына назар аударылды.
Аудан әкімдігі мен білім бөлімі бірлесіп, алдағы уақытта да мұндай кездесулерді тұрақты өткізіп, жастардың құқықтық мәдениетін дамытуға ерекше мән бермек.
