Меркі ауданында әлеуметтік қолдау жүйесін жаңа деңгейге көтеретін маңызды қадам жасалды. Бүгін аудан орталығында FSM Social цифрлық платформасының жұмыс тәртібін түсіндіруге арналған оқыту семинары өтті. Бұл – цифрландыру дәуірінде халыққа қызмет көрсетудің ашықтығы мен қолжетімділігін қамтамасыз ететін игі бастаманың жарқын көрінісі.
Іс-шараға ҚР Мәдениет және ақпарат министрлігі жанындағы «Отбасын қолдау орталығы» жобалық кеңсесінің жетекшісі Фарида Сағындық арнайы іссапармен келіп, FSM Social платформасының негізгі бағыттары мен тиімділігі жайында жан-жақты ақпарат берді. Оның айтуынша, бұл жүйе әлеуметтік көмек көрсетудің бұрынғы қағидаттарын жаңғыртып, отбасының қажеттіліктеріне негізделген нақты шешімдер ұсынуға мүмкіндік береді.
Семинар жұмысына облыстық «Анаға тағзым» отбасын қолдау орталығының директоры Эльмира Мырза-Ғали, «Еңбек ресурстарын дамыту орталығы» АҚ-ның әлеуметтік көмек және әлеуметтік қолдау жөніндегі ақпараттық-сараптамалық департаментінің өкілі Гүлнұр Сапарғали, сондай-ақ, аудан әкімінің орынбасары Өмірбек Мейірхан Азатұлы мен мобильдік топ мүшелері қатысты. Олардың қатарында аудандық жұмыспен қамту және әлеуметтік бағдарламалар бөлімінің мамандары, ауыл әкімдері, білім, денсаулық сақтау, құқық қорғау салаларының өкілдері болды.
Жиын барысында FSM Social платформасының мүмкіндіктері, әлеуметтік көмекті цифрлық форматта көрсетудің жолдары кеңінен таныстырылды. Қатысушылар нақты мысалдар арқылы отбасы жағдайын ерте анықтау, өмірлік қиындыққа тап болған азаматтарға жедел әрі сапалы көмек көрсету механизмдерін саралады.
FSM Social жүйесі отбасының әлеуметтік картасын қалыптастырып, оған қажетті қызмет түрлерін автоматты түрде ұсынып, жауапты мекемелер арасындағы үйлестіруді жеңілдетуге бағытталған. Бұл – әр отбасының мәселесіне жекелей назар аударуға жол ашатын тың әдіс.
Семинар соңында платформа жұмысының өңірлік деңгейде жүзеге асырылуы бойынша нақты жоспарлар түзіліп, қатысушылар өз ұсыныстары мен ойларын ортаға салды. Пікір алмасу алаңына айналған жиынның нәтижесінде FSM Social жүйесін енгізу барысында туындайтын сұрақтарға да нақты жауаптар берілді.
Қорыта айтқанда, FSM Social – қоғамның әлсіз топтарына қолдау көрсету ісін жаңаша сипатта жүргізуге арналған заманауи құрал. Ол – әлеуметтік қызметтерді ашық, әділ әрі жедел көрсетудің тиімді жолы. Меркі ауданында басталған бұл игі қадам алдағы уақытта өз нәтижесін беріп, сансыз отбасының тағдырына оң өзгеріс әкелетініне сенім мол.
