Құрметті жерлестер! Қадірлі Отан қорғаушылар!
Сіздерді 7-мамыр – Отан қорғаушылар күнімен шын жүректен құттықтаймын!
Бұл – Тәуелсіз еліміздің қорғаныс қуатын айқындайтын, ел мен жерге адалдықтың, ерлік пен азаматтық борыштың, қайсарлық пен қажырдың мерекесі. Бұл күн – жүрегінде Отанға деген шексіз сүйіспеншілік жатқан, ұрпақтың бейбіт болашағы үшін жанын аямай күрескен ерлер мен ел намысын бәрінен биік қойған жауынгер жүректілердің құрметіне арналған.
Бүгінде еліміздің тыныштығын күзетіп жүрген сарбаздар мен офицерлер, сондай-ақ, бейбіт күннің қадірін терең түсініп, ұрпағына қорған болуға әрдайым дайын әрбір қазақстандық ер-азамат – осы күні ерекше құрметке лайық.
Отанды сүю – туған жерге қызмет етуден басталады. Әскери қызмет – тек мамандық қана емес, бұл – ұлтқа адал болудың, ел аманатын арқалаудың, халық сенімін ақтаудың биік өлшемі. Отан қорғаушылар – елдік пен бірліктің тірегі, ұрпаққа үлгі, ұлттың рухы мен ар-намысы!
Бүгінгі бейбіт өміріміз – ел қорғаған батыр бабаларымыздың ерлігі мен қазіргі замандағы жауынгерлердің жанқиярлық қызметінің жемісі. Әрбір азаматтың жүрегінде ұлтқа қызмет етуге дайын рух пен жігер болуы – еліміздің баянды болашағының кепілі.
Осы мерекеге орай баршаңызға амандық, шаңырақтарыңызға шаттық тілеймін. Ел ертеңі үшін аянбай еңбек етіп жүрген барлық ер азаматтарға мықты денсаулық, қажымас қайрат пен толағай табыс тілеймін. Еліміз әрдайым тыныш, аспанымыз ашық болсын!
