Меркі ауданының әкімі Ербол Жиенқұловтың төрағалығымен аудандық аппарат кеңесі өтті. Кеңесте 2025 жылдың қорытындысы бойынша ауданның әлеуметтік-экономикалық даму көрсеткіштері мен барлық индикаторлардың орындалу барысы жан-жақты қаралды. Күн тәртібіндегі негізгі мәселе бойынша экономика және бюджеттік жоспарлау бөлімінің басшысы Абылай Ахметжанов баяндама жасады. Баяндамашының айтуынша, есепті кезеңде аудан экономикасының барлық негізгі салаларында тұрақты өсім қалыптасқан.
Атап айтқанда, ауыл шаруашылығы өнімінің жалпы көлемі 48,4 млрд. теңгеге жетіп, негізгі капиталға салынған инвестициялар 35,4 млрд. теңгені құрады. Құрылыс жұмыстарының көлемі де артып, 32,2 млрд. теңгеге жеткен. Сонымен қатар, аудан бюджетінің кіріс бөлігі жоспардан асыра орындалып, қаржылық тұрақтылық қамтамасыз етілген.
Кеңес барысында аудан әкімі сала басшыларының алдағы жылға арналған жұмыс жоспарларын тыңдап, олардың нақты әрі нәтижелі жүзеге асырылуының маңыздылығына тоқталды. Әсіресе, экономикалық өсімді сақтай отырып, халықтың әлеуметтік жағдайын жақсартуға бағытталған жобаларды сапалы орындау қажеттігін атап өтті.
Ербол Жиенқұлов барлық ауылдық округтерде әлеуметтік-экономикалық даму бағытындағы жұмыстарды жүйелі түрде жүргізіп, салалар арасындағы үйлесімділікті арттыруды қатаң тапсырды. Сондай-ақ, әрбір бастаманың артында нақты жауапкершілік болуы керектігін ескертіп, көрсеткіш қуалау емес, нәтижеге жұмыс істеу басты талап екенін айтты.
Кеңес қорытындысы бойынша тиісті бөлімдер мен ауылдық округ әкімдеріне нақты тапсырмалар жүктеліп, олардың орындалуы тұрақты бақылауда болатыны жеткізілді.
